《世說詩語》──名宿．講波 （2018.06.12）

足壇名宿，當然是素有名望的足球從業員，年紀明顯更是阿叔。現今足壇前線競爭激烈，三十出頭退下來，唔去中東中超賺退休金，轉型講波食開口飯，保持人氣，彷彿也是個不錯的選擇。一直對名宿講波充滿好奇，主要是他們前半生的訓練和生活，應該與講波有些距離吧。特別是當代足球評述，原是breaking views，涉及對於具體部署、戰術、陣式的評議，甚至要追溯特定踢法的專業知識和歷史發展。曾經煮過飯，並不代表深諳煮飪之道；曾經落場踢過波，也不等於擅長分析與言說吧。 

世盃開鑼前夕，英國BBC公佈講波強陣，由連尼加、李奧費迪南、林柏特、杜奧巴、奇連士文、舒利亞、薩巴列達等，領銜夢幻講波團。名宿或名叔，縱然好些持有國際教練牌，節目中大都以評論嘉賓身份出現，即使談談經驗和花邊，已有收視gimmick。一不小心像願賭服輸著底褲(按: 最後折衷為波褲)主持節目的連尼加；或派膠多過浪花的加利佬，名帥輪流開佢波，也是另類球賽邊緣風景。 

名宿講波，我推薦舒利亞。老舒敢於批評個別球員的表現，而且做足功課。分析曼城「逼搶」戰術，詳細講述「逼搶」是長時間訓練的結果，實戰時至少要有三名球員，以至全隊一齊執行；並回顧在紐卡素時代，分別在96年Terry Venables和98年Glenn Hoddles麾下，如何通過「逼搶」設下縛手縛腳的天羅地網。另一名好好睇的講波佬係林伯特，球員時代表現冷靜有頭腦，相傳智商超過150，擔任評論嘉賓時往往一針見血，講解後場「造波」關鍵、韋斯咸如何製造陷阱焗對手。相對老舒，林伯有更強的時間意識: 球賽進行多久、打成幾比幾，球員要隨之作出應變。也就是過往車路士時代講求的tactical periodization。 

名宿講波的另一好玩之處係「玩感情」。雲加退位，現場問亨利想唔想取而代之，亨利即時神色尷尬。歐聯決賽，連尼加請來林伯特、謝拉特和里奧費迪南助陣，一吹雞鏡頭close up謝四面容扭曲，真係情何以堪，唔喊仲講到嘢實在好叻仔。 

世盃2018，名宿講波又有新鮮事。「宇宙惟一港女」摩連奴，將夥拍前曼聯門將舒米高，於世界盃期間幫「俄佬台」RT講波四日，宣傳片亦於三個月前推出。精通七國語言的摩佬，唔知到時用咩語言講波呢。

原載於《蘋果日報》足球版。