歌詞精的盛夏光年

大熱天時、汗流浹背。歷時近四個月，香港流行詞人訪談錄的採訪工作已踏入尾聲，下次做埋琪哥就完成，好野。

香港流行歌詞詞風各種各樣，詞人性格亦各有不同。夕爺手握念珠滔滔不絕大談佛偈，阿Y連講句野都比喻精闢腰心腰肺，周耀輝條分縷析心思縝密，劉卓輝說話爽直健談爆笑。有人溫柔婉約、有人粗口橫飛，鍾意喪煲煙嘆香片食春卷也大有人在。訪談過程中最常見的是，在錄音室中錄音的歌手，打電話問作詞人呢句點解、果個字點讀。有詞人在訪問中，講講吓奮鬥歷程講到想哭，也有人乘機剖白有首詞俾人誤解左N年；更有人在訪問完結時突然心血來潮話，經你地一問我又好想回顧我的寫詞生涯，第時出書搵你地丫。

詞人訪問問題大部分都是我親自DRAFT和事後整理訪談紀錄，我發誓我最鍾意的幾位絕不假手於人。對創作人最大的尊重，除了真正了解他們的作品，彼此還是一種知音的關係。當然，我要感激我的老闆，當我對住喜歡的詞人，雙眼發亮、語無倫次並狀若小兒麻痺時，厚道的他通常隻眼開隻眼閉。或者佢太明白粉絲的心情，聽咗一個詞人十幾二十年，句句歌詞倒背如流，呢個人竟然突然出在眼前，你話幾激。還有感激粒粒皆星的詞人們，竟然同兩個”三唔識七”的人傾足幾粒鐘，容忍我地問埋D佢地未必想答的”文學問題”。呢個時候我能夠個個月出糧的秘密就揭曉了──我出＂粉絲問題＂。





（圖：2007年暑假與周耀輝唱K）







詞人訪問做得多會有職業病──幻聽。訪問完周耀輝和劉卓輝，我連續幾日耳邊都是〈黑房〉和〈情人〉，咁我聽日仲要教書喎，唔通在班房同學生大合唱？順帶一提，訪問中我通常同老闆一齊出現，為免我淪為路人甲，佢循例會介紹我俾人識。受訪者中只有周耀輝和劉卓輝，問我點解對歌詞、詞人有興趣，而家做緊咩。老實講，事隔兩年我仲好想再約周耀輝唱K，但填左十幾廿年歌詞的詞人可能會覺得彆扭。




(圖: 劉卓輝


呢張我影得酷如蕭大俠廣告硬照)

















再三感謝詞人們，為香港流行文化寫下了那麼多美好的東西。雖然訪問實在要為難他們不厭其煩地答好多騎呢野，我最常重複的一句其實真珠無咁真：我地會保護證人──我－一－定－做－好－你－地。