克羅地亞病遊記

（圖一：呢間無敵海景房我俾咗四晚租，但住了一晚便入咗廠。 ）




（圖二；在克國唯一有我個樣的照片 ）





華麗才子周耀輝曾謂，（為情）出走阿姆斯特丹是一件浪漫到死的事；阿Y甚至話閒着無事到倫敦走一轉簡直”唔靚都型”。我當然無兩大型人咁型咁瀟灑，今回TERM BREAK到東歐，竟然繼早年胡裡胡塗跟路人甲從布拉格坐火車去咗斯洛伐克首府、在威尼斯租床位時撞正除淨條底褲的澳洲攝影師的狼狽情狀後，最鑊鑊新鮮鑊鑊金的一次騎呢歐洲自由行。事關我在抵達克羅地亞Dubrovnik翌日，連入咗世界文化遺產的古城係咩樣都未睇清楚，便發高燒被送入Dubrovnik醫院留院，昏睡20小時裡雙手插滿”針筒活口”吊鹽水葡萄糖水不在話下。而我竟變態得覺得Dubrovnik醫院的男女醫生幾靚仔靚女，兼且早午晚營養餐實在好好食。

三日後出院，主診醫生千叮萬囑要我保存體力不要喪跑景點，最好每日只做一樣野，讓本來已經夠hae的我名正言順每日咩都唔做，只係行行企企食飯幾味。之後順着原先的行程設計到了克羅地亞第二大城Split，房東是一名騎着電單車的靚仔浪人，我話佢知我其實啱啱在Dubrovnik出院，佢二話不說即幫我張羅蜜糖、檸檬、抗生素，仲連laptop都留低埋俾我用。結果我在佢間屋睇足三日世界盃歐洲區外圍賽連精華重播都撈埋，又响facebook同人吹水，最後竟然無聊到在youtube喪睇台灣綜藝節目。














從經濟效益來講，真係諗極都唔明點解要山長水遠去到克羅地亞做呢d嘢。不過靚仔房東帶我去果間地道餐廳真係好好好食，仲成為我在Split三天以來的飯堂。佢地的domestic food 其實係意大利雲吞，搭枱的路人乙同我講因為當地勁多意大利移民，所以就將人地的野當正係自己的傳統貨色。據我小道消息了解，當地仲有不少阿根廷移民，所以周街都有售阿根廷波衫。…就係因為咁，"因病之名"我邊度都無咩點去，上帝似要為我再踩呢條旅遊路線留下最迷幻的藉口。