（圖：國米淘汰巴塞後，摩連奴被熱情粉絲包圍）
巴塞隆拿對史特加
如果觀眾唔知，真係以為巴塞輸緊波架。係吔潘san，你睇吓D球員幾拼搏，係咁追個波喎。美斯睇落真係好抵請架。哇，史特加好彩踢唔到個波啫。係吔潘san，你睇鏡頭影住果個西班牙女仔，都幾上鏡喎。同意呀阿丘，哎吔，不過呢球都相當醫院喎。係吔潘san，唔係美斯實可以梅開二度或者大演帽子戲法甚至大四喜呀。不過我睇希比都踢得好辛苦喎，唔知亨利有無安慰吓佢呢。係吔潘san，求先亨利射列文果陣，十足以前響阿仙奴練波咁。同意呀阿丘，如果賽果不變都係二比零，咁就巴塞贏架啦。係吔潘san，全歐最強巴塞呀，真係無邊隊球隊想對巴塞架。同意呀阿丘，咦，哥迪奧拿的髮線明顯又向後退啦。係吔潘san，我地響過去一年，的確見證咗哥迪奧拿的髮線同髮量的變化喎。
XXXXXXXXXXXXXXX
2005歐聯冠軍對利物浦
利物浦用上俯拾皆是的一切示範與足球血肉相連。不管是街道、食肆、商場，還是巴士私家車車身，舉目皆是「2005歐聯冠軍利物浦」的標語和圖像。連民宿主人與我們閒聊時也是指着滿屋的利物浦和愛華頓海報紀念品大談特談，晏菲路球場的展覽廳固然把賽事精華日播夜播，「2005歐聯冠軍利物浦連追三球反勝」儼然被演繹為利物浦隊以至利物浦城市精神（也可以說2005歐聯冠軍後，不復當年勇而被迫無「新貨」上市！）。其實願意將利物浦和愛華頓相提並論大概是民宿主人的待客之道，兩隊勢成水火的仇口，在現實世界簡直演化到七情上面的地步。猶記得問人晏菲路球場如何前往，原是愛華頓球迷的路人甲即語帶不屑的揶揄：「咁既的地方你地都好去？！」且悻悻然離去。看來富豪球會利物浦與走工人路線的愛華頓之間，真箇「階級鬥爭」終日互藐。英格蘭北方大城紐卡素，則對紐卡素隊有相當不一樣的「邊緣感情」。作為北方邊陲城市，紐卡素人對紐卡素隊可以代表北方，在大英帝國核心工業英超聯中打拼，感到非常自豪。2009年5月紐卡素宣佈降班後，民風相對淳樸的紐卡素還是普遍樂觀－－我們會再回來。相對之下，英格蘭中部諾丁罕的足球氣氛卻截然不同，對於兩屆歐聯冠軍、一度淪落英乙的諾定咸森林，實行封口政策「無眼睇」。偶爾有醉酒佬恨得牙癢癢抱怨森林不爭氣，識趣的酒保還是跟我們聊聊羅賓漢比較經濟實惠。
XXXXXXXXXXXXXXX
車路士對國際米蘭
嗶的一聲，螢光綠色衫的球證又吹罰啦，佢向安歷卡攞出兩張牌──一張係「機會」一張係「命運」。咁安歷卡就揀咗「機會」，球證馬上朗讀內容：「犯規者要即時跳火圈乙次」。極有效率的旁證便搬出火圈一個，熱情澎湃的觀眾為作出鼓勵，即攞出好多紅手巾出來揮動並吶喊助威，跳－跳－跳！嘩，真係說時遲那時快，安歷卡見群情洶湧，面燶燶拿拿聲朝火圈縱身一跳，話咁快跳完啦，只係右邊袖口俾火燒燶咗少少。連敵方領隊摩連奴都忍不住遙距豎起拇指讚好。安歷卡的粉絲更唔知從邊度弄來法式公雞二隻，送俾偶像當獻花咁話。…..球證又再吹雞，比賽繼續。另一邊廂，車仔眾將見安歷卡跳罷火圈，心中起火，有英超容祖兒之稱的艾辛相當狠截咁截擊正要帶球前進的伊度奧，兩位非洲足球代表似乎一D都無對同鄉手下留情喎，艾辛情急之下拉跌咗伊度奧，球證又再吹罰。呢次伊度奧在「機會」、「命運」之間揀咗「機會」：「受侵犯者可以選擇球賽提前十分鐘或延遲十分鐘結束」。國米正在領先，伊度奧詭異一笑，就揀咗提早十分鐘讓同袍收工沖涼。史丹福橋大球場內的所剩時間就由16min變為6min，摩帥撅起嘴，安察洛堤霎時面如玄壇。
XXXXXXXXXXXXXXX
足球論壇對魔幻粉絲
我曾經是網上足球論壇的常客。網上足球討論區很多時候不談策略陣式球隊優劣，只有瘋狂灌水和倒瀉粉絲的愛──「沙仔去阿仙奴啦！」「亨利我永遠支持你….千祈唔好去曼城呀!」「美斯仔個女友都幾靚女喎！」我在2007年美洲國家盃時，曾經在某足球俱樂部，轉貼過一篇湯禎兆分析南美足球技術特點的文章，沒想到即時遭到球迷喊打叫囂。湯文把美洲國家盃所以場場多波入，歸因於南美足球崇尚進攻「有前無後打死罷就」，結果即時挑動了南美球迷的敏感神經。先別論湯文觀點是確診還是武斷，網上足球論壇原不傾向條分縷析以事論事三省吾身，波衫消息組隊捧場則無任歡迎。狂熱和愛，原是揪心揪肺死去活來，跟粉絲解簽根本就是與他們的神祗過不去。根據2006年世界盃時，希臘粉絲鄧小樺的講法，粉絲崩潰時更出現魔幻自責症候群──「都係我腳頭唔好，唔係點會次次睇直播捧場都輸波？！」為了愛隊出線，魔幻粉絲堅決立誓唔睇愛隊直播（贏咗先睇番錄播云云）。畢竟世上原無不敗之師，06/07摩帥與車仔輸於曼魚，07/08的巴塞亦屈居皇馬之下，2009年洲際國家盃地上最強西班牙也爆冷被美國踢出局。魔幻粉絲下詔罪己的心靈行為，原是一種化被動為主動的身份建構，把自己放大到──我（重要到）可以陀衰愛隊──的關鍵位置。
XXXXXXXXXXXXXXX
阿根廷對尼日利亞
歡迎家庭觀眾又再番嚟08年北京奧運的鳥巢，收睇男足金牌決賽。今日係8月23號，北京氣溫高達40幾度，大家真係熱到飛起喎。求先大家睇到啦，踢踢吓大會都唔忍心d球員咁辛苦，破例俾咗5分鐘「飲水時間」呀。係吔鬼SIR，「飲水時間」喎，我講咗咁耐波都見過呀。鳥巢足球賽事真係零舍有中國特色架。係吔肥SAM，今屆阿根廷同尼日利亞爭金牌，你本人睇好邊隊波咁呢。我當然睇好阿根廷啦，有個世界級防中艾邦丹斯利響度，贏面高d咁啦。係吔鬼SIR。同意呀肥SAM，咳…….唔好意思，世界級防中係馬斯查蘭奴先啱。係吔鬼SIR，艾邦丹斯利係守門員先真，今次仲無嚟北京添。哎…突然直播畫面又出現咗少少問題，咁要同家庭觀眾「洒個冧」先。同意呀肥SAM，今次球王馬勒當拿都有來北京睇波喎咦。係吔鬼SIR，佢仲帶埋前妻，女友同囡囡來北京喎。同意呀肥SAM，呢d咪真男人真本事囉，嘻嘻…..kamkam……係真球王真本事先至啱。
XXXXXXXXXXXXXXX
西班牙對玲玲大師
2010年世界盃熱身賽，法國對西班牙之後，大家對法國領隊杜明尼治的星座排陣愈來愈感興趣。西班牙媒體更嘀咕，人腳麻麻的法國對壘地上最強西班牙，居然只失兩球。為咗響世界盃上登頂，西班牙國家隊重金禮聘了香港風水命理大師玲玲姐，為西班牙排陣。精通紫微斗數的玲玲姐覺得要發揮一隊球隊的最大威力，最理想就是將「紫微十四星曜」都排進去，包括左右中場必須係「太陽太陰」雙劍合璧，用沙維恩尼斯達就最啱，前場應該要有殺氣，最好係「七殺、破軍、貪狼」的殺破狼組合。殺破狼亦有「竹籮三限」之稱，咁先能夠發揮最大的殺傷力。所以前場可以排上費比加斯大衛施華夾韋拿。西班牙的「紫微星」就係隊長門神卡斯拿斯，由於守龍門要訣在於「藏」，所以玲玲姐建議實行「雙龍門制」，以「武曲星」域陀華迪斯同場同時頂住龍門大關，咁就必勝無疑啦，同時亦可解決域陀華迪斯長期無得正選的尷尬情況。賸餘的「廉貞天府天相天梁天同」，就係馬達碧基艾比奧爾沙比阿朗素沙治奧拉莫斯和相當唔好老脾的嗌交「巨門星」佩奧爾了。呢個6-2-3的陣式，就係玲玲姐的精心佈陣，主教練迪保斯基就當然係講求臨場變化的「天機星」。至於王子費蘭度托利斯與大鬍子古爾沙，由於命宮無正曜，恐怕對國家隊無甚助益，與法國的查斯古特同一命運，玲玲姐只能暫列兩名鋒將冷坐後備板凳。
XXXXXXXXXXXXXXX
肥馬對土人巫師
2006年世界盃期間《蘋果日報》刊登了一項球迷性格分析：「捧阿根廷：狂野，善良，無拘無束，叛逆，瀟灑，渴求英雄，追求精神生活，不滿足於機械化生活。」這二十年多來的阿根廷足球散發着輕靈又慓悍、脆弱又硬朗的獨特氣質，兼具浪漫和神秘，如馬勒當拿、風之子肯尼基亞、後馬時代的安迪加和當紅炸子雞美斯和阿古路。有說足球是阿根廷在這個世界上的唯一名片，馬勒當拿的「茅躉王」形象也超級深入民心。根據「國家性格」，阿根廷可算一個奇怪的南美國家，和巴西相比其實更歐洲化，氣質上卻更具有美洲的浪漫和神秘的氣息，阿根廷作家博爾赫斯就鬼馬得很。2008年年底，阿根廷足協任命馬勒當拿做大國腳教頭，國民超興奮，本土及國際體育媒體卻差不多冇人睇好。可是，那是阿根廷，她自有一套浪漫價值觀；國家隊所反映的國家性格，更在阿根廷足球這門國球中表露無遺。近年阿根廷國家隊一直糾纏在要華麗定要成績的兩難，貝隆夫人的「別為我哭泣，阿根廷！」成為每次阿根廷在大賽中大熱落敗必然奏起的哀音。2009年10月在風雨飄搖中晉級世界盃決賽周，肥馬在國家隊結黨營私的醜聞更無日無之。可是，那是阿根廷，肥馬是神話還是笑話根本不重要，關鍵是阿根廷人的奇異思路──對上一次登上世界頂峰的是1986，咁由肥馬壓陣美斯阿古路呢班黃金一代咪岩數囉──浪漫率性到咁，為講波佬提供無數話題的肥馬，將與南非準備出動作法念咒的土人巫師真係各自各精采。
原載於《字花》第廿五期 （May–Jun 2010），頁28-29。
沒有留言:
發佈留言