《世說詩語》──世盃成名賽（2014.06.19）

四年一度世界盃，有人踢出身價波，有人遲暮勁抽筋。每屆世盃落幕，球會轉會窗口總有大手交易，傳統智慧話齋，淨係響世盃起過腳都聲價十倍。

 

近幾屆世盃成名人物，令人印象猶深的有1998年克羅地亞神射手蘇加，2002年塞內加爾迪奧夫、據說後來因淘汰意大利被意甲炒魷魚的南韓安貞煥，還有2010年烏拉圭「手球出線」的哨牙蘇蘇亞雷斯。至於2006，除了玩「心口碎大石」的施丹頭鎚，最「成名」的，我選「三黃一紅」的英格蘭球證普爾，派（紅黃）牌風格創意澎湃，堅揪到前無古人，相信亦後無來者。

 

有時候，所謂「成名」，不一定是球員球證，上屆的八爪魚保羅就唔係人。保羅本來喺德國奧柏侯遜海洋館安份做八爪魚，只是成功全部估中德國隊賽果，在猜中決賽戲碼西班牙對荷蘭之前，八強階段甚至收過死亡恐嚇，實在匪夷所思。今屆「成名」者，有「消失的噴漆」。由揭幕戰登場，球迷覺得好玩，實情是2013年摩洛哥世冠盃，球證已用它來定出人牆正確位置。我好喜歡這種疑似忌廉噴槍的玩意，首場有球員縮腳避噴，情境十分好笑。當然，「大埔LULU」後來居上。小組賽中LULU睇好的克羅地亞、西班牙、英格蘭、日本，全線敗北，臉書被「有LULU無窮人」金句洗版。話時話，LULU破燈之夜，C朗那「豬一樣的隊友」比比亦「一豬成名」。看來，今屆世盃成名賽，才剛開始。

 

 

原載於《蘋果日報》足球版。