《世說詩語》──去泰國睇波（2014.07.04）

你無睇錯。過去幾天，我飛泰國睇波去了。

因為唔鍾意上網睇波窒吓窒吓，曾經幾次為睇世盃，死死氣安裝收費電視。世盃結束後，有無條線的新聞台還勉強可以睇吓，但今屆世盃係是旦台播喎，之後23個月難道睇經典台神鵰俠侶? 條氣唔順，唔想俾錢是旦台賺。

我密謀出遊。小組賽後半段至十六強、香港無免費波睇期間，外地五星酒店實有得睇。心想小組賽不是組組有睇頭，十六強就點都要睇。單就十六強入八強的8場波來算，酒吧睇每人平均消費$250，8場盛惠$2000。查遍就近亞洲國家足以睇曬8場的PACKAGE，泰國5日4夜$2599，白天仲可以玩埋，值。

事關世盃前夕，泰國軍方執政機關下令廣電部門，確保泰國國民不費分毫就能收看比賽。此舉屬於軍方「喜悅運動」的一部分，此前已經推出免費理髮和舉辦演唱會等蛇齋餅糭，世盃更是殺手鐧。當然，以世盃作為與民同樂的懷柔手段或公關術，已不是什麼秘密--

德葡大戰，德國女總理默克爾御駕親征打氣；美國對加納，奧巴馬也在社交網站發表自己握拳睇直播的「實況」照片。哥倫比亞、伊朗、智利、墨西哥等多國政要，都紛紛以不同形式表達自己對國家隊的熱愛。哥倫比亞大勝希臘隊，更為哥國總統連任增加競選籌碼。英格蘭最後一場，連哈里王子都要飛去捧場。咁講法，狼英係咪應該檢討吓呢? 尤其搞得掂世盃64場在港免費播放，公關效果應該好過耍那撞鬼八段錦吧。

 

原載於《蘋果日報》足球版。